У Аршанскім раёне нараджальнасць упала на 22,5%. Чыноўнікі прапануюць узмацніць тлумачальную працу

Аршанскі райвыканкам паведаміў пра зніжэнне нараджальнасці ў раёне на 22,5%. Гэтую лічбу згадалі ў паведамленні пра пасяджэнне прэзідыума выканкама, прысвечанае пытанням аховы здароўя.

Чытайце таксама: Школьнікаў у Брэсцкай вобласці становіцца менш. Што паказваюць апошнія шэсць гадоў?

Пры гэтым чыноўнікі не назвалі ні колькасці народжаных дзяцей, ні перыяду, з якім параўноўвалі паказчык. Таму з паведамлення нельга зразумець, за які час нараджальнасць знізілася на 22,5% і колькі дзяцей у абсалютных лічбах нараджаецца цяпер.

Чыноўнікі прапануюць узмацніць тлумачальную працу

У паведамленні Аршанскага райвыканкама гаворыцца, што было вырашана «ўзмацніць тлумачальную працу з насельніцтвам». Таксама пытанне плануюць падняць 15 кастрычніка падчас правядзення Адзінага дня інфармавання.

BGmedia заўважыла, што ў матэрыялах, якія прапануюць прадстаўляць у гэты дзень, вялікая ўвага надаецца прапагандзе «традыцыйных каштоўнасцяў». У іх асуджаюць нібыта «позняе ўступленне ў шлюб»: паводле апублікаванай інфармацыі, сярэдні ўзрост беларускай жанчыны пры ўступленні ў шлюб складае 26 гадоў, а мужчыны — 29. Чыноўнікі лічаць гэтыя паказчыкі занадта высокімі. Крытыкуюць таксама людзей, якія адмаўляюцца ад нараджэння дзяцей.

Асобна згадваюцца праблемы міграцыі, але без тлумачэння іх прычынаў. Яшчэ адна мішэнь крытыкі — жаданне спачатку «пажыць для сябе». На думку аўтараў матэрыялаў, такую ідэю дзецям «агрэсіўна прасоўваюць у сацсетках». У якасці аднаго з адказаў прапануюць абмежаваць непаўналетнім доступ да гаджэтаў.

Да 2030 года чыноўнікі плануюць павялічыць колькасць народжаных з 6,5 да 7 на тысячу насельніцтва, знізіць смяротнасць да 11,5 на тысячу і павялічыць чаканую працягласць жыцця да 76,5 года.

Пра іншыя захады, якія маглі б паўплываць на нараджальнасць, у паведамленні не згадваецца. Не паведамляецца і пра канкрэтныя меры падтрымкі сем’яў з дзецьмі, якія збіраюцца рэалізаваць у раёне.

Чытайце таксама: Чаму ў Брэсцкай вобласці нараджаецца больш дзяцей? Беларусы абмяркоўваюць статыстыку Белстата

У Беларусі нараджальнасць упала да аднаго з найніжэйшых узроўняў

Зніжэнне нараджальнасці ў Аршанскім раёне адбываецца на фоне агульнага пагаршэння дэмаграфічнай сітуацыі ў Беларусі.

Пасля перапынку ў публікацыі статыстыкі нараджальнасці і смяротнасці Белстат у 2025 годзе апублікаваў дадзеныя за 2024 год. Паводле іх, у краіне нарадзіліся 58 938 дзяцей. Гэта быў адзін з найніжэйшых паказчыкаў за пасляваенны перыяд.

Паводле афіцыйнай статыстыкі, у 2025 годзе сумарны каэфіцыент нараджальнасці ў Беларусі знізіўся з 1,08 да 1,03 дзіцяці на адну жанчыну. Натуральнае змяншэнне насельніцтва павялічылася з 56 тысяч чалавек у 2024 годзе да 62 тысяч у 2025-м.

Асобна Белстат паказаў паказчыкі па рэгіёнах. У Мінску сумарны каэфіцыент нараджальнасці склаў толькі 0,67. Для параўнання, у Брэсцкай вобласці ён дасягнуў 1,34 — гэта самы высокі паказчык у краіне. У астатніх абласцях ён знаходзіўся ў межах 1,04–1,19.

У 2026 годзе Белстат апублікаваў і звесткі за 2025 год: у Беларусі нарадзіліся 54 257 дзяцей — на 4681 менш, чым годам раней. Колькасць памерлых за той жа час склала 116 530 чалавек. Як вынікае з дадзеных, смяротнасць больш чым удвая перавысіла нараджальнасць. Паводле статыстыкі, за адзін 2024 год насельніцтва Беларусі скарацілася амаль на 0,5 % — да 9 109 280 чалавек. За апошнія пяць гадоў краіна страціла каля 301 тысячы жыхароў, а з 2000 года — амаль 893 тысячы.

Пры гэтым афіцыйная статыстыка не ўлічвае ўсіх грамадзян, якія выехалі за мяжу. Раней прадстаўнікі беларускіх уладаў агучвалі ацэнкі, паводле якіх пасля 2020 года краіну маглі пакінуць некалькі соцень тысяч чалавек. Аднак паводле дадзеных Еўракамісіі, колькасць беларусаў, зарэгістраваных у краінах ЕС па стане на 2024, нашмат больш: беларусы атрымалі ў агульнай складанасці 981 757 першасных дазволаў на жыхарства (ВНЖ, доўгатэрміновыя працоўныя, вучэбныя ці гуманітарныя візы) у краінах Еўрасаюза.

Паводле экспертных ацэнак Цэнтра новых ідэй, BEROC і міжнародных арганізацый, рэальная колькасць беларусаў, якія фактычна пастаянна жывуць і працуюць у краінах ЕС пасля хвалі эміграцыі 2020 года, складае ад 400 000 да 600 000 чалавек.

Чытайце таксама: З карты Беларусі зніклі яшчэ пяць населеных пунктаў. Чаму вёскі працягваюць выміраць?

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро